ملعون ابوك يا شعر

. . . قول يا قوال
قول يا شاعر
صحى فى قلوبنا المشاعر
ما انا كل ما افضفض واقول
الوطن ينزف ميت رصاصه ف معدتى
والطيارات ابابيل بتنهش فى السما
والحجارة دانات وشدة الالسنة
. . . .
بحر البقر
والقدس بكر بتغتصب . . . .
عمر المختار . . سليمان خاطر
صلاح الدين . . وثناء محيدلى
عبد الناصر . . وصبرا وشتيلا
وميت الف مغتصبة وقتيله
فوق صدرك يا وطن
. . . .
قول يا شاعر
يابو ضحكة سارقه نور الصبح من عيونا
يابو حلم سابق فرحة خطاوينا ف خيالنا
. . .
وايه يفيد القول . . ؟
واحنا سكارى فى حرب هز الوسط
ومليون قصيدة حب ومياعه
واغنيات جاكسون وحب ومادونا
ومانشيتات شجب واستنكار
ملطخه صدر جرايدنا
لايدز مستطونات اليهود
اللى داسوا مقدساتنا بالجزم
. . . .

قول وقول وقول كمان --
يابو كلمة مدنا وصوت بلال
يابو قلب دافى وصوت كمان
. . . . . . .
وايه اقولواحنا فيران تجارب لكل الاسلحة
لبنان بتنزف
والعراق مادة الكفوف يمة حضن
القاهرة
شبح الحصار ف القدس
لجم لسان الحق
وقتل الحلم ف قلبنا
والامهات بترضع اطفالها
خوفورعب من بطش اسرائيل
وفى المستشفيات بيطعمونا
بمصل الاستسلام والمسكنه
. . .
. . . قول يا شاعر - قول يا حاوى
قول وطلع من جرابك
. . . ما احنا ما بنملكش غير تل الحكاوى
وان تعبنا بنقلب الحزن ف ثوانى
مهرجان رقص وغناوى
. . .
ايه ملعون ابوك يا شعر
ان صحيت شفايفنا م السكوت
وقطعت بايدك لسان الخرس
ودقيت جرس الجهاد ف كل البيوت
وان رفض الوطن ينصاع لك
فسيبنا نسكر بدم اطفال الحجارة
: ونحلف ان الوطن
رجمه حلال
. . . .

رجمه حلال

* . * . *